యుద్ధం

 

నియంతల  నిరంకుశ నిర్ణయాల కిందపడి  నలుగుతున్న ప్రజలు !
పరిపాలకుల  అహాలకి  స్వాహా అవుతున్న పౌర సమాజాలు !!

శతాబ్దాల చరితను తుడిచి పారేస్తున్న సైనికుల పదఘట్టనలు !
నాగరికతను నిలువునా  కాల్చేస్తున్న అగ్నిశిఖలు !!

విరామమెరుగక పనిచేస్తున్న ఆయుధ కర్మాగారాలు !
క్షిపణుల తాకిడికి  ఛిద్రమవుతున్న క్షితిజ తలాలు !!


వెల్లువలా  దూసుకొస్తున్న తూటాల సమూహాలు !
గగన తలాన్ని నిర్దయగా చీలుస్తూ సాగుతున్న యుద్ధవిమానాలు !!

నిట్ట నిలువునా విరిగి పడుతున్న ఆకాశహర్మ్యాలు !
కారు మబ్బులా  కమ్ముకుంటున్న విషవాయువుల మేఘాలు !!

ఎడతెగకుండా తెగి పడుతున్న శరీరాలు !
మానప్రాణాలకు రక్షణ ఇవ్వలేని వ్యవస్థలు !!

తిరిగిరాని తండ్రుల కోసం పిల్లల ఆర్తనాదాలు !
మరలిరాని  భర్తల కోసం  భార్యల  నిరీక్షణలు !!

అసువులు బాసిన కొడుకుల కోసం తల్లి తండ్రుల ఎదురుచూపులు !
చావలేక బ్రతుకుతున్న క్షతగాత్రుల నిటూర్పులు !!

గర్భస్థ శిశువుల జననాన్ని కోరుకోని మాతృదేవతలు !
దహన  సంస్కారానికి కై  వేచి చూస్తున్నా నిర్జీవ దేహాలు !!

ఖరీదైన సూటు బూటు లో దాచి ఉంచిన ఆటవిక సంప్రదాయాలు ! 
మరణాలతో వ్యాపారాలు సాగిస్తున్న అగ్రరాజ్యాలు !!

ప్రాణాలను లెక్కించక సరిహద్దులు దాటుతున్న సామాన్యులు
రక్షణ లేని వినువీధిని విడిచి పోతున్న శాంతి కపోతాలు !!

మానవాళి యావత్తు సిగ్గుతో తలదించుకున్న క్షణాలు !
మానవుని మనుగడను  నిష్కర్షగా ప్రశ్నిస్తున్న ఈ యుద్ధాలు .....